Мілош Мерічко: „Меджілабірцi суть цїлосвітовым русиньскым центром“
З 12. юном, выголошеным Світовым конґресом Русинів за День Русинів Словеньска, суть повязаны многы важны подїї. В тот день быв в роцї 1848 в Празї завершеный історічно першый Славяньскый зїзд вшыткых Славян жыючіх в Австро-Угорьскій монархії, протягом 1. ЧСР ся в Пряшові орґанізовали масовы ославы Днїв русиньской културы а в роцї 1933 быв в Пряшові на намістю (перед теперішнїм Театром Й. Заборьского) одкрытый памнятник великому русиньскому будителёви Александрови Духновічови.
В пятніцю пополїдне (12. 6.) завітав до Меджілаборець і Мілош Мерічко. Гуменьскый пріматор брав участь на славностній процесії містом. За співу русиньскых співанок перешли притомны од будовы містьского уряду к Дому културы. Наслїдно ся перед памятнов таблов припоминаючов, же ся ту одбыв 1. Світовый конґрес Русинів высловили приговоры і одбыла ся културна часть. Єй златым клинцём были Лабірьскы бетяре, участници облюбленого змаганя Земля співать і фолклорный ансамбель Хемлон з Гуменного.
Кедь дозвучала словацька і русиньска гімна, участників сердечно поздравив і гуменьскый пріматор. Свій приговор отворив в русиньскім языку, за што сі такой выслужив ляпканя на отвореній сценї.
„Барз сі цїню позваня на ославы Дня Русинів Словеньска. Русиньска оброда є на Словеньску барз актівна. Патрить ся 30. юбілей припомянути сі якраз в Меджілабірцях, котры поважую за світове головне місто Русинів. Донедавна сьме жыли в єднім сполочнім окресї а русиньске жытельство в нїм творило вызначну часть. Є тому так в Гуменнім доднесь. Сідлиско під Соколеём, Сідлиско ІІІ. ці локаліта Дубник суть переважно заселены Русинами або їх потомками. Історію сі припоминаме і уліцями, котры несуть мена Духновіча або Добряньского, традіції і звыкы утримують співацькы тїлеса Русинія, Русиньскы голосы або Лелія. Частёв днешнїх ослав є фолклорный ансамбель Хемлон, котрый умелецкы веде Мирослав Кереканіч а презентують тыж русиньску културу. Жычу вам, жебы ся ваше місто, окрес і цїлый северовыход Словеньска розвивав і за помочі русиньской културы. Вшытко найлїпше, Русины,“ конштатовав Мілош Мерічко.
Меджі далшых участників і гостей ослав належали Владїслав Вішнёвскый, пріматор Меджілаборець, Мартін Караш, председа Русиньской оброды Словеньска (РОС) і член світовой рады Русинів, Петро Медвідь, порадця презіденткы СР за Русинів і шефредактор Народных новинок ІнфоРусин, Володимір Противняк, председа містной орґанізації РОС в Меджілабірцях і таёмник Світовой рады Русинів.
День Русинів 2020 орґанізовали Містна орґанізація Русиньской оброды в Меджілабірцях в сполупраці з містом Меджілабірцї.
Маріян Шкуба
Реферат пресы
Містьскый уряд